Lectuur of Literatuur?
Hij zat in zien olle kraokstoul bai de taofel en keek mai an, mien beste kameraod Bastiaon Brobbel, de bekinde Drinse Schriever. De kaastklok krummelde de tied, die körkdreug an de zoller hung.
"Maag ik je wel wat vraogen?", zee Bas. Hij kreeg zien kromme piep van de taofel en stopte hom bedaord met klaaine plukkies van Van Nelle.
"Vanzölf", zee ik, "vraogen is vraai. Wat wo'j weiten?"
"Wat is nou eingelk Drinse Literatuur?”, zee Bas.
"Literatuur?", zee ik.
"Ja", zee Bas, "Drinse Literatuur."
"Nou,"begunde ik. "Literatuur dat is... e... nou ja, dat is wat er schreven wordt."
"O", zee Bas. Hij knipte met zien ansteker, die geel anfloepte met 'n hoge vlam. "Dan is alles wat er in de kraanten staait en in de Story en Margriet dus Literatuur?"
"Nee", zee ik, "dat vanzölf neit." Die Bas kan zo lastig wezen ja asmets. "Wat in de kraanten en de tiedschriften staait, dat is meistied gien Literatuur, dat is meer Lectuur."
"Zo", zee Bas. "En wat er in de bouken staait?"
"Dat kan Lectuur wezen, "zee ik, "mor ok wel is Literatuur."
"As ik 't goud begriep", zee Bas, "dan is Lectuur meer om zo mor is te lezen, om wat gewaor te worden. Mor wat is dan Literatuur?"
"Bai Literatuur gaait ´t niet zo slim om 't verhaol, mor meer om de meneier waorop dat verhaol verteld wordt", zee ik. "'t Gaait niet zo slim om 't WAT, mor meer om 't HOU. Literatuur is meer e…"
"Meer vechten met de taol", zee Bas. "Ik begun ´t te begriepen. Mor wat is nou Drinse Literatuur?"
"Tja", zee ik.
"Is alles wat er schreven wodt in 't Drins nou Literatuur?”, zee Bas. "Of neit?"
De olle kaastklok tikte. Bas bluis een rookwolk oet waor e nog laank naor keek en wai zatten met ons baaidend an de taofel en prakkezeerden deip.
(Roet, 3e jaargang nr. 2, blz. 16. Juni 1981.)