Drents Genootschap 


Meneer de veurzitter, volk, 

Al heil wat joaren, bin ik lid van het Drins Genootschap, loater ok van de Culturele Road veur Drinthe. Ik heb mai altied wat verboasd over dat Veur Drinthe. Noar mien zin haar dat beter Van Drinthe wezen kund.
Nou liekt het er zo op dat hier wat brocht worden moet, van boeten of.
En wai hebben hier in ons Olle Landschop toch nog zoveul eigen dingen die de muite weerd binnen!
Wai hebben nog zoveul eigen dingen: oeze volk het nog een eigen wezen, een eigen levenssfeer. 
En moet een Drins Genootschap niet ók, nee, moet een Drins Genootschap niet in de eerste ploats opkommen veur die streekeigen cultuur? 
Moet een Drins Genootschap niet opkommen veur het behold van die dingen, die veur onze minsken nog altied van zo grote beteikenis binnen?
Cultuur, meneer de veurzitter, dat is niet allinnig een concert hier of doar of een tentoonstelIing van min of meer moderne kunst, mor cultuur is dat, wat er deipverankerd lig in 't wezen van een minsk. 
Selma Lagerhoff het is zegt: cultuur is dat, wat er overblif, a'j alles vergeten, wa'j leerd hebben. 
Dat is niet veul, meneer de veurzitter, mor 't is wel van groot belang!
En het is de muite weerd doarveur onze beste krachten in te spannen. 

Een Drins Genootschap, dat niet opkommem zul veur onze streekeigen cultuur, dat mag dan een Culturele Road veur Drinthe wezen, of een Genootschap, mor een Drins Genootschap is dat in mien ogen neit. 
Dat is net as 't Moandblad Drinthe, dat 'n mooi blad wezen maag, met 'n heil mooi omslag en vol met dure statistieken en grafieken, mor ik mis er in de figuur van de Drinse boer op zien es, die staait te knollen plukken op 'n nevelige noajoars noamiddag…
Het is nou zo dood, meneer de veurzitter. En nou wil ik gien Drins Genootschap, en gien moandblad Drinthe, die op de kneien liggen veur de folklore en veur alles wat mor old is en ollerwets, mor ik wol zo geern een Drins Genootschap en een Moandblad Drinthe, die heur niet schoamen Drints te wezen, mor woarin ploats is veur en andacht veur het wezen van onze Drinse minsken van vandoag de dag, woarin belangstelling is veur dat klaaine beet’ie holvast, dat wai zo heil haard neudig hebben in dizze, ons overrompelende tied!
Daanke.


rede uitgesproken voor 1983 (let op de "oa")