ANNECHIE VAN ROON
-Annechie:
'k Bin Annechie van Roon, Veur omtrint doezend joaren
Bin 'k in een olle hut van holt en stro geboren.
Hou klaain was mien gehucht! 'k Weit neit meer houveul hutten
Het volk hier en het vei veur 't roege weer beschutten.
Mor 't gung al gouw veuroet, ik zaag hier alles gruien
Ik zaag hier in de bos de olle maarke bluien.
De es gaf rog en vlas veur eten en veur kleren
En veur de waarme wol gung men de schoapen scheren.
De koiien gavven melk en botter op het brood
En veur het spek en vlaais stak min het slachtzwien dood.
En as zo nou en dan het ol boerhoorn ruip
Dan zaag ie hou het volk as ein tesoamen luip.
Dan gung min metmekoar as ein man an het waark
Doe was het olle dörp eindrachtig nog en staark!
-De Gemeinschopszin:
Doe woonde Ik nog hier en 'k luip bai ieder in
Gien ein wees mai weerom, mai, de Gemeinschopszin.
Doe stun veur mai de deur in alle hoezen open
Doe huifd'ie niet vergees op hölp van anern hopen.
Doe was de noaberschop hier nog de vaste baand
Die 't levend meugelk muik op 't Drinse plattelaand.
-Gezellighaaid:
En as de winter kwam en iederein bleef binnen
Dan zat het vrouwluvolk bai d'olle heerd te spinnen.
Verhoalen kwammen lös ; van lang vergeten doagen
Sprak 's oavens 't kerelvolk, van rampen en van ploagen
Verhoalen kwammen lös, van geesten en van spouken
Die loerden op het volk in alle duustre houken.
De störmwind gierde om 't hoes, de olle eiken bogen
Het kroakte overaal. En zwaarte wolken vlogen
Veur moan en steerns langs, mor in datzölde uur
Zat Ik, Gezellighaaid, in ieder hoes bai 't vuur!
En as dan hier of doar een spinsteroavend kwam
Dan was veur 't jonge volk het hek ja van de dam.
Dan wus Gezellighaaid dat plakkie wel te vinden
En gung de jeugd van 't dörp tot ein gemeinschop binden.
-Annechie:
Zo gung dat lange tied, 'k weit neit hou minnig joar.
Verscholen in de bos laag 't olle dörpie doar.
't Was bos en wildernis en zaand en hoge haaide
Woarop de scheper doags de Drinse schoapen waaide
't Was rust, zover min keek en 't levend was een sleur
En zoas 't altied was, zo gung dat altied deur.
Nee, toch neit, want ok hierzo kwammen naaie wegen
En minsken onbekind, die kwam ie hier soms tegen.
De haaide, dat wör grond, waar boerderaaien stonnen
Er was veur 't olle dörp een naaie tied begonnen!
Ze wazzen aal verdwenen, de wevers van aleer,
Er was gien looieraai, er was gien brouwer meer.
Aal wat er neudig was, dat huil min oet de stad
En veur het olle dörp, doar schoamde min hom wat.
De tram zat barstensvol, noar stad tou, allemoal!
Noar stad, noar stad, noar stad! De stad is 't ideoal!
-Miss Moderniteit:
Vooruit! Scheer je weg! Nu heers Ik in Roden!
Alles van vroeger is ten strengste verboden!
Wie daar nog aan denkt, die wordt stapel geacht!
Ik heers in het dorp en groot is mijn macht!
t Verleden ging onder in een roemloze strijd
Ik h'eers in het dorp: Miss Moderniteit!
'k Bouw huizen, 'k bouw straten: Kanaalstraat, Beuklaan...
-Annechie:
Ja, wies doar nou ein mooi plakkie is an!
-Miss Moderniteit:
Vooruit jij! Terug! Jouw tijd is voorbij!
Ik heers in het dorp! Het dorp is voor mij!
Ik maak van jouw dorp aan de Bitse een stad!
De huizen twee hoog! Een balkon! En een plat!
Gemeenschap? Vooruit! Elk doe wat hij kan!
Wie achterblijft klopt maar bij 't armbestuur an!
Een gek is het die zich aan anderen wijdt!
Ik heers in het dorp: Miss Moderniteit!
-De Gemeinschop:
Mor gung dan de klank van dat olle boerhoorn
De roup der gemeinschop, veur altied verloren?
-Gezellighaaid:
En is dan de gezellighaaid dan, beste vrinden,
Allein mor bai jazz in de dancing te vinden?
-Annechie:
Nee niet inkeld da klank van de altsaxofoon
Heur ik hier 's oavends weerklinken in Roon.
Hier heur ik de zang, doar kopermuziek,
Hier zei ik toneil en doar gymnastiek.
-Gezellighaaid:
Mor wat ze ok doun doar, ein ding weit ik wis,
Dat Gezellighaaid overaal erelid is!
-Gemeinschopszin:
Elk vuilt bai toneil, bai muziek en bai zang,
Dat min waarkt veur 't geheil, veur 't gemeinschappelk belang.
-Annechie:
Zo zei ik mien dörp, deur 't Moderne zo schonden
Hom langzoam herstellen van zien iezelke wonden.
-Zang:
Ik bin de zang en ik wil zingen
Leidies over mooie dingen,
Die hier an ons korte leven
Kleur en grote riekdom geven!
-Muziek:
En as 't weer zummer wordt in boeten
Goa ik op de koepel toeten.
De dag verglee, de zun verzonk
Die even nog in 't koper blonk.
En deur de stille oavend klinkt
Een wiezie dat van vrede zingt.
-Toneil:
En wanneer de laampen branden
Zeg ik met woorden, holling, handen,
Alles wat ik weer kan geven
Van een anerman zien leven.
-Gymnastiek:
En ik bin de gymnastiek
Die op mooie marsmuziek
Minnigein een naai besef
Van levenslust en bliedschop gef!
-Annechie:
Da's allemoal wel mooi en allemoal wel goud
Mor ein ding is er toch da'k joe nog zeggen mout.
Wanneer ai doar zo zingen en speulen met mekoar
Kiek, dan vergeet ai toch 't veurnoamste neit, niet-woar!
Hou klaain joen club ok is, van 't dörp is het een deil,
En wat of ai ok doun, 't het invloud op 't geheil!
Al kunnen met mekoar, wanneer ai doarnoar streven
Mien dörp een naai gezicht, een naaie inhold geven!
Mor trek joen tonen in! En aners loop op klompen
Er wordt gien goud beraaikt met schelden en met stompen!
-Gemeinschop:
Wai kunnen an ons dörp een sfeer vol ruzie geven,
Mor as 't er einmoal is, dan moet wai doarin leven!
Doarom in het vervolg de handen in mekander!
Niet schelden op mekoar, niet raggen op een ander!
Mien Roon is toch zo mooi: een roampie, een gedien'ie
Wat bomen om de kerk, wat wasgoud an een lien'ie!
Een vogel zingt zien leid. En boven schient de zun...
-Gezellighaaid:
Oh, as er in zo'n dörp wat einighaaid bestun!
Mien Roon is toch zo mooi! Dat elk zien schoonhaaid zaag...
Dat elk begreep, dat 't in zieg eigen handen laag
Om an dat olle dörp een naaie geest te geven
Woarin 't veur iederein een lust was om te leven!
-Annechie:
Zo hoop ik, dat in Roon de olle kankergeest
Met Miss Moderniteit, verjagt wordt deur dit feest!
En met joe allemaal, en met Gemeinschopszin,
Goa ik vol goeie hoop een naaie Toukomst in!
Voor een Dorpsavond in Hotel Van der Molen - 1945 ?