OP 'T DUNNERBOERVELD (BAI MANS EN GEERTIE)

A'j de kraanten 's oavends lezen
Dink ie: "Wat is de wereld slecht!
't Heile spul zit dik in toezel,
How komp dat ooit weer terecht? 
Alles wordt ja doagelks duurder, 
Man, woar moet dat wel noar tou? 
Mor ak heil deip in de put zit, 
Weit ai wel, wat ik dan dou ? 

Refrein: 
	Op het Dunnerboerveld bai Mans en Geertie 
	Doar vergeet wai ons verdreit 
	Want doar zit wai om de kachel 
	En doar zing wai dan een leid. 
	Want doar is het zo gezellig 
	Doar vervelen wai ons neit: 
	Op het Dunnerboerveld bai Mans en Geertie 
	Doar vergeet wai ons verdreit! 

(het volgende couplet was doorgestreept) 
A'j de kraanten 's oavends lezen 
Moak ie joe soms gloeiend kwoad 
Want now krie'j in ploats van kovvie 
Doakies kovviesurrogoat. 
Da's 't begun, mor woar is 't inne 
Woar gaait dat op 't lest noar tou? 
As de kop mai al te roeg wordt, 
Weit ai wel, wat ik dan dou? 

(Refrein)

A'j de kraanten 's oavends lezen
Moe'j je heil voak aargern, want 
Altied krie'j doar weer te lezen 
Van dat "aarme Drinse laand" 
Krek of Drint, nog net as vrouger 
Roegte was en wildernis, 
Woar de leste vieftig joaren 
Nog gien spier veranerd is! 

(Refrein)

A'j de kraanten 's oavends lezen 
Zei je dat de boerenstand 
't Allermeiste exporteerde
Veur ons aarme Nederland. 
Mor de minsken doar in Holland 
In Den Hoag en Amsterdam, 
Die vergeten, dat heur eten, 
Einmoal oet ons Drinte kwam. 

(Refrein)

(het volgende, laatste couplet was doorgestreept) 
A'j de kraanten 's oavends lezen 
Worden boeren knorrend vet; 
Mor zolaank de kunstmes duur is, 
Leuf ik dat nog niet zo net.
Want as Lieftinck er weer west is 
Met zien zoveulste biljet 
Vin 'j allein mor kaamferballen 
Aachter 't linnen in 't kamnet. 

 
Lieftinck = minister van financiën 1945-1952