Braand

Midden in de naacht rinkelde de telefoon. Aorend Bos greep slaoperig met zien linkerhaand naor het nachtkassie, waor dat ding op stun.

`Met Aorend Bos', zee e, nog haalf boeten westen.

`Met Mans Doedens', klonk het an aander kaant. `Wei'j wel dat joen hoes in braand staait?'

`Nee man', zee Aorend, `daor wus wai nog niks van. Gusteraovend doe wai op berre gungen, was alles nog in order. Hou bi'j dat zo gewaor worden?'

`Nou', zee Mans, `wai wazzen gusteraovend op verjaorsvezite west bai ons Rieks en de vrouw. Och en dan wei'j wel hou of dat gaait: een lief vol kovvie en allemaol zuitighaaid. Ik was zo dik as een tiek dou wai weer naor hoes tou gungen… En met zo'n volle maog kan ik nooit goud in slaop kommen. Dat, ik laag nog mor aal te draaien van de eine zied op de aander. Mor slaopen, ho mor! Ik gung is recht overinde in 't berre zitten en keek is naor boeten in. En doe zaag ik daor licht bai joe in het aachterinde.'

`Wat zul dat toch wezen?', docht ik. `Aorend het toch ok gien schaopen meer die nog lammern moeten? Mor doe zaag ik daj de boudel in braand staon hadden. Ik zeg tegen Maarchie: `Ik leuf dat ze bai Aorend Bos het hoes in braand staon hebben.'

`Dan muj ze vort wel even waorschouwen', zee Maarchie. `Het muit mai, Aorend, a'k je wakker maokt heb… Mor ja…'

`Nee man, hartstikke bedaankt daj even beld hebben!', zee Aorend. `Ik zal der vort even waark van maoken.' Hij legde de hoorn op de haok.

`Wel belde daor?', vruig Sinao, `zo midden in de naacht? Hadden ze neit even waachten kunt tot mörgenvro?'

`Dat was Mans Doedens', zee Aorend. `Hij wol even zeggen dat er braand was. Bai ons, in het aachterinde.'

`Braand?', zee Sinao. `Hou kan dat nou? Gusteraovend was alles nog in order. Hou is e dat zo gewaor worden?'

`Nou', zee Aorend. `Mans kun neit goud in slaop kommen omdat ze gusteraovend naor Rieks en de vrouw tou west hadden op verjaorsvezite. En daor haar e nogaal riekelk veul kovvie had. Dat, zodounde.'

`En doe zaag e, dat hier bai ons de boudel in braand stun?', zee Sinao. `Haar e dan neit beter vort even de braandweer opbellen kund?'

`Dat haar misschie aal zo goud west', zee Aorend. `Mor ik dink, dat e hom neit als te veul met aandermans zaoken bemuien wol. Hij is meinsttied nogaal wat veurzichtig met dat soort dingen.'

`Nou ja', zee Sinao, `dit is in als geval aordig beter as dat die Rieks Boer het 't eerste zein haar! Die haar het ja vort het hele dörp deurtoeterd dat ons hoes in braand stun!'

`Gelukkig mor daw goud verzekerd binnen', zee Aorend. `Hest de polis toch wel goud opbörgen, neit?'

`Jao', zee Sinao, `die zit in de trom boven in 't kamnet. Zukswat moej altied veur het griepen staon hebben as je is wat overkomp.'

`Zul börgemeester ok nog kommen te kieken?', vruig Aorend. `Dat döt e meinsttied aal as er braand is.'

`Börgemeester?', ruip Sinao. `Man, dan maag ik wel maoken dat ik de krulspelden tou 't haor oet krieg! Dat zul ja gien gezicht wezen!'

`Maagst wel vortmaoken', zee Aorend. `Ik leuf da'k de brandspuit al ankommen heur!'

`En hest nog helemaol neit opbeld!', ruip Sinao. `Hou zulden ze dat nou gewaor worden wezen?'

Doe sluig Haarm Brink van de vraaiwillige brandweer het glaas van de slaopkaomer in groezels.

`Aorend en Sinao!', ruip e. `Bi'j der nog in? Joen hoes staait in braand!'

`Jao', zee Aorend. `Dat wus wai aal! Wai kommen der vort an, heur!'

En hij stook de beinen van 't berre.