Boompie

Der mus een naai eikenboompie kommen bai Jan Hinnerks veur 't hoes, omdat de olde deur een dronken kerel ondersteboven reden was. Het bestuur van Dörpsbelangen haar op het gemeintehoes al een maol of wat zegd dat er een naai boompie kommen mus, mor tot nou tou haar dat neit veul hölpen.

Mor nou zul het er dan toch van kommen. Op een mooie zunnige novimberdag, as alle bomen staon te pronken in honderd kleuren geel en broen en rood en gruin, dan komp er van het gemeintehoes een ambtenaor anzetten in een mooie auto. Hij stapt oet veur de semi-bungalow van Jan Hinnerks, döt veurzichtig het portier van de auto dicht, krabt met de naogel van zien rechterwiesvinger een muggenstip van de lak en kik is in 't ronde. Dan maggelt e wat in zien notitieboukie, want laoter op het kantoor, dan moet e hier een rapport over schrieven. En as Jan Hinnerks of olde Klaos Klont er neit ankommen om een praot'ie te maoken, dan stapt e nao een toertie mor weer in. Autovergoeding: 2x6=12 km, noteert e in zien boukie.

Een dag of wat laoter komp er dan weer een auto oet het hoofddörp anzetten. Ditmaol kommen der drei ambtenaoren oet met een groot pepier. Zo zei'j dan mor, dat rapporten neit veur niks schreven worden. Ze hebben wel degelk heur nut. Ein van de drei legt zien pepier op de kap van de auto en strik het veurzichtig glad. Dan kieken ze alledrei een toertie in zudelijke richting, dan naor 't westen, dan naor 't noorden en dan naor 't oosten. En as ze dan heilemaol in 't ronde kommen binnen, dan kieken ze weer op het pepier en zuiken ze het stee, waor as dat boompie kommen moet. Ein van heur maokt met zien schou een kruus in het graas van de baarm. De twei aandern kieken der een schoffie naor en nikken. En, omdat Jan Hinnerks op verjaordagsvezite is en Klaos Klont naor zien schaopen tou, vaalt er wieder neit veul meer te zeggen. Ze lopen staorigan weer naor heur auto tou en dan gaon ze naor hoes.

Dan komp er een dag of wat laoter een gruine waarkkeet anrollen. Die wordt veurzichtig an de kaant van de weg hinzet, mor blif veurlopig nog onbewoond.

Tot, op een dag, dan kommen der drei gemeinteaarbaaiders anzetten op de fiets. Ze stappen aof bai de keet, ein döt de deur lös en ze gaon der in. As ze weer in boeten kommen hebben ze elk een blauwe overal en gruine stevels an en een naaie schop in de haand, daor ze met lopen of het een handstok is. De ein kik op een pepiertie en wis, waor of dat boompie kommen moet. Dan graoven ze met heur dreien een gat. Mooi zuver veierkaant en om beurten elk vief spitten. Dan hebben de aandern even tied om weer bai te kommen. As het gat klaor is gaon ze zachiesan weer naor de keet, want ze kunnen neit wieder: het boompie is der nog neit. As ze de overal weer oet hebben is het al twintig veur twaalf en dan moeten ze neudig op hoes an veur de middagpot.

's Middags binnen ze der weer. De gemeinte-auto komp er al gauwachtig anzetten met een boompie. Ai zein: het draaibouk klopt veur honderd procent. De ambtenaoren op het kantoor doun goud heur waark. Dat zig elkenein zo neit, mor het is aal zo. Mor dan blik dat de chauffeur het wolmaniseerde paoltie, dat bai de boom staon moet, vergeten het met te nemen. Met heur veiern staon ze daor een schoft over te kribben, hou of dat nou wel kan. Dan klimt de chauffeur wat grammieterig weer aachter het stuur van zien auto en ridt e weerom. De aandere drei kroepen weer in de keet en even laoter kringelt er mooie witte rook oet de schorstie, krek of der een naaie paus kozen wordt. Afijn, die dag komp alles in order. Het boompie staait zuver in 't lood naost zien paoltie en elkenein is dik tevree.

Weer een dag of wat laoter, as het heil mooi weer is, komp er een kerel van het gemeintehoes anzetten. Hij stapt aof bai het boompie, schudt is even an het paoltie, krabbelt wat in zien boukie, want hier moet e een rapport over schrieven, en dan ridt e nog dreihonderd meter wieder, omdat e heurd het, dat daor ok nog een boompie kommen moet.

En dan begunt alles weer van veuren aof an…

-----------------------

Bij het voorlezen van bovenstaand verhaal op een bijeenkomst waar ook gemeentepersoneel aanwezig was, was de reactie na afloop lauw.