ZUNNER PUNT'IES
'Die keerl is staopelgek!' ruip Bastiaon Brobbel, de bekinde Drinse Schriever. 'Een tiek het e in de kop, mor gien hazzens!'
'Ja, mor waor he' j 't nou eigelk over?' vruig ik verzichtig.
‘Waor of ik 't over heb?' schrowde Bas, 'Waor of ik 't over heb? Waor zul ik 't aners over hebben as over die dokterandus Holting, die keerl van ROET? Die zal mai even vertellen hou of ik een Drins gedicht opschrieven moet! Een echte waarme Drinse Dichter die schrif op wat of e vuilt deip in zien haart. Mooie gedaachten over dingen van vrouger en over 't weer en over zien verdreit en zien ellinde. En hou of e dat opschrieven wil dat zal e zeker toch zölf wel weiten muggen?'
'Niks te jamorren!' ruip Bas. 'Die keerl zeg daj alles opschrieven moeten zunner heufdletters en zunner komma's en zunner stippen en punt'ies. Dat is modern! ‘Nou,' zee e, 'hier heb ik een gedicht. Mien allernaaiste. En niet ein van mien minsten,' zee e. Hij huil hom even stil, beschaaiden as e is. 'En dat heb ik nou is opschreven zo as die dokterandus zunner hazzens dat wil. Heilemaol zunner heufdletters en zunner komma's en zunner stippen en punt'ies. Lees dat nou mor is en dan moe'j mor zeggen o'j er ein spier van begrepen hebben', zee e. Hij stopte mai een slonterig pepiertie in handen.
Ik leesde :
eenboerzatopeenrichelpaoljoeheejoehaajoehoohijzungeenleid'ieeenschandaoljoeheejoehaajoehooeenmooieleivejongemaaidwasdeureenboerenzeunverlaaidjoeheejoeheejoehaajoehoodatgungjavrougerzoeenbontekouluipdeurhetgrasjoeheejoehaajoehoodatgeelvanbotterbloumenwasjoeheejoehaajoehoozeheurde'tzingenevenanmorsnapted'rgienbliksemvanjoehoojoehoojoehaajoeheevanwatdieboerdaorzeewatweitzo'ndommekoud'rvanjoeheejoehaajoehoowatwichteroverkommenkanjoeheejoehaajoehoozo'nkouzalnietbaiduustermaonin'theuivakwatan'tvraaiengaonjoeheejoeheejoehoojoehaadatdöteenkouneitja
'Waorom moet een gedicht nou zo stoer opschreven worden?' zee Bas.'Dat begriep ik neit'. Hij keek op zien horlozie. 'Over twintig minuten moe'k bai de dokter wezen', zee e. 'Ik moet wat hebben veur de zenen'. En hij dee de deur lös.
(Roet, 3e jaargang nr. 1, blz. 30. Maart 1981.)
Naaisgierig naor dit gedicht “Leid’ie”? Het steit in de bundel “Trekwaark” op bladziede 118.